“Амин хэлхээ байгаль сан”-ын тухай

Бидний зорилго

Амин хэлхээ байгаль сан нь байгаль хамгаалах, нөхөн сэргээх, ойжуулах, нийгмийн байгаль хамгаалах сэтгэлгээнд эерэг нөлөө үзүүлэх, байгаль хамгаалах идэвхитэй, тогтвортой үйл ажиллагааг явуулах, зорилго нэгтэй иргэн, ААН-тэй хамтран ажиллах, байгаль хамгаалах олон улсын байгууллагуудтай хамтран ажиллах, төсөл хөтөлбөрүүдийг амжилттай хэрэгжүүлэх зорилготойгоор Галтууд барилга угсралт, барилгын материал үйлдвэрлэлийн компаний дэргэд 2014 онд байгуулагдсан. Амин хэлхээ байгаль сангийн санхүүжилт нь “Амин хэлхээ” сургамжит өгүүллэгийн номын борлуулалт болоод Галтууд ХХК-ын тоосгоны борлуулалтаас тоосго бүрээс 1₮ -ийг сангийн дансанд хуримтлуулах байдлаар бүрддэг. Бид цаашид олон улсын байгууллагуудтай хамтран ажиллах зорилтыг тавин ажиллаж байна. Сангийн санхүүжилтийг бүрдүүлэхээр зохиогч Бүдээгийн Баярчимэгийн “Амин хэлхээ” сургамжит өгүүллэгийн номыг англи, монгол хоёр хэл дээр хэвлүүлэн худалдаанд гаргасан бөгөөд сангийн www.avitalbondnature.org сайтыг нээн тус сайтаар дамжуулан номыг гадаадын зах зээлд борлуулах зорилгоор цахим худалдаанд гаргасан. www.bookstore.mn сайтад дотоодын иргэдэд цахимаар борлуулахаар байршуулсан. Манай сан нь үйл ажиллагааныхаа хүрээнд говийн унаган ургамал болох хармагны бут сондуулийг говийн ойжуулалт хэмээн үзэж “Байгалийн жимст бутыг хамгаалалтад авах” хөтөлбөрийг санаачилан хөтөлбөрийн хүрээнд 2 үе шат бүхий “Байгалийн жимст бутыг хамгаалалтад авах” төслийг хэрэгжүүлж байна. Төслийн I үе шат болох судалгаа шинжилгээний төслийг хэрэгжүүлэн Өмнөговь аймгийн хэмжээнд хармагны бут сондуул бүхий газрын тандалт судалгааг хийж зурагжуулан, хармагны бут сондуулийг шилжүүлэн суулгах туршилт судалгааг амжилттай хийгээд байна. Санг олон нийтэд таниулах зорилго бүхий цахим сүлжээгээр мэдээлэл түгээж байна. 2014 оны 4 сараас 2015 оны 9 сарын хооронд говь нутагт цөлжилтийн ажиглалт дүгнэлт хийж жилээс жилд элсний нүүдэл нэмэгдэж, хармагны бут үхжиж, жимсний ургалт муудаж байна гэж дүгнэсэн. Тиймээс элсний нүүдлийг тогтоон барьж байдаг, говийн ургамал амьтдын амьдрах орчныг бүрдүүлдэг гол бодгаль хармагны бут сондуулыг хамгаалах шаардлагатай гэсэн дүгнэлт хийв. 2013 оны 4 сард хармагийг шилжүүлэн суулгах туршилтыг амжилттай хийсэн бөгөөд 2015 оны 08 сард жимсийг хурааж авсан.